BUPATI DAN KAJARI TERJARING OTT OLEH KPK
“Tam…, ndeeeeeh…., Yo lah tamak bana pak Bupati jo Pak Kajari tu lei,” kata Utiah Kapeh kepada Tam Arang dalam perjalan menunaikan Sholat Subuh di Mushalla dekat rumah mereka pagi ini Kamis (3/8).
“Hai…, tamak ba’a mangko pak Hendrajoni (Bupati Pessel) ang kecekkan? Korupsi liau? Sudah tu Kajari Painan ndak apak doh, tapi ibu Kajari. Waang pagi pagi lah memfitnah. Fitnah labiah dari pembunuhan tu coy,” kata Tam Arang
“Waang alun habih den mengecek lah ang potong. Ndak tadanga dek waang tadi den alun manyabuikkan Namo Bupati dan Kapalo Kantua Jaksa tu siapo. Nan den sabuikkan baru Bupati dan Kajari tamak, kan itu kecekkan den baru nyo.”
“Bupati dan Kajari mano nan waang kecekkan tamak, mangaponyo?”
“Aaaaa…., tu baru mantaf ang tumah, batanyo dulu. Bupati dan Kajari tamak tu adolah Bupati Pamengkasan di Madura.”
“Bilo ang ka Madura tu, jauh ma, Jo kapatang tabang pai kalau perjalanan mulai dari kampuang awak jauh mah. Naik oto ka BIM, dari BIM ka Bandara Suta transit baru ka Surabaya.”
“Nde…. Dimano latak utak ang tu, pagunokan lah Kapalo waang ko untuak bapikia,Jan untuk penimbang badan sajo.”
“A…,jadilah.. Mungkin ang baco di media Online yo?”
“Iyo…, pak Bupati jo pak jaksa Pamengkasan tu ditangkok dalam operasi OTT, manyangkuik dana desa. Kini kaduonyo masuak kandang situmbin lah dijadikan tersangka dek KPK.”
“Baa caritonyo kok bisa lo karano dana desa tu Bupati dan Pak Kajari terlibat dalam aksi korupsi?”
“Itu den Ndak jaleh doh.”
“Iyo hebat KPK tu ndak Tiah, Sadang kan bantuak itu banyak juo nan ndak suko KPK tu ado. Ka nyo adokan pulo hak angket di DPR RI untuk mengkerdilkan kinerja KPK tu.”
“Iyo lah ndak elok wakia wakia awak tu lei. Kama pangana e tu?”
“Ntah lah Tam,”
“Kok pai awak ka Jakarta tu, awak tamui uda Fadli Zon dan Bang Fahcri Hamzah, tu kito ajak nyo mangopi Vietnam di cafe Olivia Grand Mall, lai ka namuah liau tu Tiah?”
“Kok itu yo batanyo awak ka Bung Saidal Mapiudin ( salah seorang Anggota DPRD Sumbar-red), Mano tau awak bisa liau rekomendasikan batamu Jo Uda Fadli dan Bang Fahri Hamzah tu.”
“Alah mah Tiah ang gadang ota mah, balapiah lapiah ota. Kenal sajo ang Jo Bung Siadal indak ba’a pulo ang ka minta rekomendasi.”
“Hehehehehhe..”
“Ko lah Tibo awak di Musajik urang adzan Jan bacaito juo didalam mushala ko dzikir dipabanyak. Urang adzan di jawek dalam hati.” ujar Tam Arang mengingatkan.
Keduanya masuk kedalam Mushalla,mengambil tempat sebagai makmum dalam sholat subuh yang hanya 6 orang jumlahnya termasuk Utiah Kapeh, Tam Arang dan Imam sholat di Mushala itu.
