“Tam….., kini ko gawat nan tajadi di Kecamatan IV Jurai, Kabupaten Pesisir Selatan, Sumatera Barat,” kata Utiah Kapeh pada Tam Arang saat mereka dalam perjalan usai menunaikan   sholat Subuh di Masjid di hari Sabtu (5/8).

“Apo nan gawat tu  Tiah, ado teror Bom di Kecamatan IV Jurai?”

“Indak teror bom doh, Mano lo ado teror bom di Kabupaten Pasisir Selatan ko, selagi bule (urang barat) alun masuak ka satu daerah, alun ka ado teror bom tu lei. Pacayo lah ang tu!”

“Dek ang mangatokan gawat mangko den mangecekkan apo ado teror bom. Biasonyo kato gawat tu untuak mangatokan sebuah peristiwa genting yang diikuti bakal ado korban jiwa dari peristiwa genting itu. Sarupo teror bom, misalnyo.”

“Iko gawat nan den maksud ko adolah takaik jo kaba, pengajuan surek undur diri, dari 33 orang kepala SD IV Jurai ka Dinas Pendidikan Pasisir Selatan.”



“Oooww, itu nan ang katokan gawat? Maundurkan diri ancak malah, banyak ka gantinyo tumah, sorang pai, saribu mendoakan, supayo capek lah pai.  Kini awak ndak buliah kareh hangok doh, o.., ndak ado awak,  tu ndak kajadi. Ndak ado caritonyo tu.  Dunia ko ka langsuang juo di urang nyo…  Tapi Tiah, Apo sabeknyo 33 Kapalo SD maundurkan diri rami rami?”

“Sababnyo tak lain manyangkuik razaki. Jadi bacari cari  alasan, sahinggo alasan tu, galak galak sorang den mambaco berita di Media Online tu dek ang Tam.”

“Apo buni alasan nan mambuek ang galak galak Sorang mambaconyo, Tiah?”

“Salah satunyo pernyataan nan nomor 1 dan nomor 4. Isinyo mangatokan, sebagai Kapala sekolah ibonyo jo gurunyo nan diangkek jadi bendahara. Sabab guru guru tu tasita wakatunyo maaja 24 jam saminggu, sudah tu poin nan ka 4, Kapalo sekolah maraso diadu domba jo guru warga sekolah. Kiro kiro masuak aka ndak?”

“Masuak aka atau indak tu beko lah awak tantu-an. Tapi nan jaleh Kapalo sekolah SD di IV Jurai tu paibo bana ka guru gurunyo. Tak usah diangkek jadi bendahara karano lah latiah karajo dek maaja. Mungkin mukasuiknyo bendahara tu tak paralu mamacik pitih. Karano ndak sarupo jo biaso, SPJ diancam dek Kapalo sekolah ndak ka mambuek.  Hehehee?.”

“Bilo seseorang komandan ibo jo anak buahnya, bantuak kepala SD di IV Jurai tu?”

“Antahlah Tam. Biasonyo sifat komandan ko nan banyak mampakudo anak buah. Tapi kini Kapalo SD IV Jurai ibo nyo samo anak buahnyo. Hebat….hebat bana Kapalo sekolah tu yo, wajarlah mereka ingin baranti sadonyo. Hehehehe.”

“Ba’a kok galak ang Tiah?”

“Banyak nan den galakkan.”

“A tu?”

“Pak Kapalo Dinas ko a.”

“Manganyo?”

“Dikecekkan dek Kapalo SD suko maancam. Acok kepala SD tu kanai ancam.”

“Kok tahu Bupati, Kapalo Dinas nan Suko maacam tu pasti/kanai bangih dek Bupati mah.”

“Baa ko tahu lo ang Bupati bisa bangih ka Kapalo Dinas tu. Kabanyo Kapalo Dinas ko urang kampuang Bupati.”

“Samo pak Bupati ndak ado urang kampuang diliau tu doh. Kalau Kapalo Dinas tu banyak merugikan dan menjatuhkan pak Bupati pasti dituka dek pak Bupati mah.”

“Kok tuka ka manuka tu, Ndak jaleh di den doh, itu hak prerogatif Bupati mah. Liau berhak mencari pembantu liau nan punyo loyalitas, integritas dan kapabilitas tajamin.”

“Den kalau lah pakai intekTas tu, atau tas, tas tu nan ang baco,  Den ndak ngiato tu doh. Ancak Wak sudahi sajo ota awak ko lei yo.”

“Kalau iyo tak mangarati waang molah  awak ka Lapau Mak Gambuang lei mangopi. Beko setelah habis kopi, Wak pai mamukek ka pasia yo mencari kapanasi agak sagulai.” ajak Utiah Kapeh yang di iyakan oleh Tam Arang.

By Pilar