DONDONG AIE DONDONG DADAK
PILARBANGASANEWS.COM.
“Tam…., ang kok bakawan hati hati yo, kalau ado kawan minta tandotangan ka waang memprotes pejabat Jan amuah nak,” kata Utiah Kapeh mengingatkan Tam Arang saat minum Kober (kopi bareng) di Lapau Mak Gambuang, Senin pagi ini (7/8).
“Ba’a tu Tiah, tanda-tangan lo nan takana dek ang pagi ko. Tanda-tangan den mano pulo ka banguno, Limo Ratih Piah tak laku tandatangan den doh.”
“Ow.. Yo, Yo, lupo den. Sangko den ang tadi Kapalo SD Kecamatan Bunga Mekar.”
“Alun juo salasai persoalan kepalo SD nan mengundurkan diri di Kecamatan Bunga Mekar tu lei, Tiah?”
“Salasai ba’a mukasuik ang ko?”
“Alah tanang?”
“Kok dikatokan tanang iyo alah, sabab ka 49 kepala SD tu lah ditarimo surek pengunduran dirinyo. Secara hukum lah syah mereka baranti, sabab kan mereka nan maajukan surek tu. Tanpa paksaan katonyo mah.”
“Ndak bisa dicabuik?”
“Ang kecekkan panen kacang tanah ko, bisa dicabuik bilo lah masak. Kalau jadi Kapalo SD tu jabatan lah hebat tu mah. Kalau zaman Ulando dulu, lah buliah pakai baju nan gadang gewangnyo.”
“Tadi ang peringatkan den supayo hati hati membubuhkan tandatangan, apo mukasuik ang Tiah?”
“Yo hati hati sajo. Jan sampai dondong aie dondong dadak. Urang hilie awak taragak.”
“Den danga Kepalo sekolah nan mangundurkan diri tu, kabanyo mereka akan dipareso samo Bawasda yo?”
“Waserda ko apo?”
“Ndak waserda doh, tapi Bawasda. Kalau waserda singkatan dari warung serba ada, Bawasda kepanjangannyo adolah Badan Pengawas Daerah, dulu Inspektorat Daerah namonyo. Karajonyo mamareso pegawai nan bermasalah.”
“Onde…, ba’a nasib mereka tu bisuak tua a. Lai ndak tajatuah dihimpok janjang pulo?’
“Kok itu yang ndak bisa den meramalkan tu doh, sabab den lah lamo lo indak karajo disitu.”
“Tadi mengenai Tando tangan nan harus hati-hati ko, alun ang jalehkan lei. Apo mukasuiknyo?”
“Nyo bisuak macam tu tu a, ado diantara kepala SD tu lapeh nyo dari jarek samantaro inyo otaknyo. Inyo nan kareh ingin protes dan minta baranti, tapi inyo lo nan indak dibarantian. Samantaro nan tak tahu menahu hanyo ikut ikutan maneken, justru inyo nan diangkek baliak jadi kepsek.”
“Kok macam itu yo lah sansai tu mah. Balaku hukum Donding Aie Dondong dadak ka inyo tumah. Lah sansai tumah.”
“Makonyo hati hati jan amua kanai provokasi. Kalau dihinok menuangkan ota awak ko tamasuak memprovokasi ko mah. Tapi provokasi dalam artian positif jatuahnyo ka motivasi, untuk itu Kapalo harus barisi. Hehehehehh.” kata Utiah Kapeh mengakhiri pembicaraan mereka.
