ADO UNJUK RASA DI PAINAN?
“Tam…, den baco di medsos, hari kini ko ado demo di Painan,” kata Utiah Kapeh dalam perbincangan mereka pagi ini Senin (24/7), tentu masih tetap di Lapau Mak Gambuang.
“Jadi juo demo tu Tiah.
“Mungkin jadi, sabek kapatang ado den baco di Facebook, kawan den mamposting mangabakan bahaso demo tu ka dilaksanakan hari Sanayan ko. Ado route jalan nan kaditampuah manuju Gaduang DPRD Pesisir Selatan.”
“Lai dapek ang bocoran nan kadituntuik dek para pengunjuk rasa?”
“Pasti bana indak. Tapi manuruik kaba kaba nan sampai ka talingo den, menyampaikan mosi tak pacayo ka Ketua sekaligus mandasak supayo ketua DPRD Pessel ko mundur dari jabatannyo, sudah tu mamintak supayo DPRD melanjutkan Pembangunan RSUD disamping tatap memproses hukum kalau ditamui ado pidananyo.”
“Lai ka aman unjuk rasa tu, Tiah.”
“Amanlah. Ndak ka kacau pulo doh, karano dalam himbaun pamlet nan ditulis, demonyo taratik dan damai. Kapado peserta demo dihimbau supayo bisa manjago ketertiban. Ndak buliah buek gaduah.”
“Kok lai macam itu syukurlah, Tiah.”
“Awak di Pasisia Salatan ko sabananyo adolah masyarakat adat. Masyarakat nan selalu mautamokan musyawarah untuk mencapai mufakat. Demo atau unjuk rasa bukan budaya awak. Tapi Iko dek mancaliak TV jadi tapangaruah untuk mancubo.”
“Kok itu iyo mah Tiah, Bahaso demo atau unjuk rasa tu bukan budaya awak, tapi ka ba’a juo. Awak danga sa dulu. Mudah-mudahan nan demo bisa jan sampai mamasokan kahandak. Sabab tuntutan itu bisa jadi ado nan Ndak bisa dipenuhi. Kalau ndak bisa dipanahi dek ndak ado aturannyo, nan demo diharokkan bisa memahami.” ujar Utiah Kapeh mengakhiri perbincangan pagi mereka.
