Caracau Mery Ame (4) ; Maracak Honda Mati Pajak

Malam gaes….,
tadi habis tarawiah baimam jo apak paja dirumah, aku dapek kaba. Kawan aku nan sabana dekat dan akrab, inyo masuak rumah sakik.

Dek setia kawan dalam diri aku ko sangaik tinggi di kamu gaes a, tak takana kini bahaso awak tak buliah kalua rumah. Aku kaluakan Honda nan lah duo tahun mati pajak.

Salamo ko baik malam maupun siang hari, takuik aku mangaluakan honda itu gaes, takuik kanai tilang dek pak polisi lalulintas.

Tapi karano malam hari kini hari hujan rintik rintik , aku barani gaes. Sabab pasti polisi lalu lintas malam hari di musim Covid-19 ndak ado nan barani kalua lai doh.

Setelah honda lah kalua, aku baok sorang kawan, namo kawan aku itu tek Siti, liau baumua 58 tahun.

Badan liau ngenek, kuruih kariang, tapi sehat jarang liau mengalami sakik, jan ka sakik talatak, damam sajo sakali 1 tahun kadang tak pernah.

Lai tahu gaes baa mangko Tek Siti bana nan aku baok?

Baliau ko sigap, maloncek pandai. Bagociang tu santiang, raso tak ada mambaok apo apo awak kalau liau bagonciang dibalakang.

Kini…, Tek Siti lah duduak dibalakang, aku tancap gas, honda lari kancang 80Km/Jam.

Malayok layok lari honda ko gaes. Kami sajo nan dijalan nyo gaes, urang tak ado nan kalua, langang Nagari dek patuah imbauan pemerintah di rumah saja. Tak lamo kemudian hanya 10 menit tibo kami di Puskesmas Tarusan.

Kiro e aku salah masuak gaes ..

Lupo aku bahaso Puskesmas Tarusan di lockdown dek wabah covid19 ko, lah seminggu tutuik kalau tak salah.

sacepek kilek aku puta kapalo honda baliak , aku puta gas honda, honda maloncek co kilek.

Aku pai ka rumah kawan nan sakik itu, nan bajarak labiah kurang satangah duo kilo dari Puskesmas Tarusan arah ka Padang.

Setelah tibo dirumah kawan nan takaba sakik itu, kiro e, Tek Siti tak ado nyo lei di balakang.

Tasirok darah aku dek e gaes, dima nyo tatingga?

Aku puta lo baliak stang honda aku, ku racak Honda kancang kancang.

Apo nan tajadi gaes?

Tek Siti lah lumuih dek luluak, baju tek Siti lah basah kuyuik, kiro e balau jatuah masuk banda, saat aku mamuta stang honda di Puskesmas Tarusan tadi.

“Ndeh yo ndak selasai kau doh yo, Mery. Kau tinggakan den sorang tapuruak dalam banda, ” kata Tek Siti mengaluah.

Tadinyo aku cameh gaes, kok ado nan patah atau luko . Tapi dek nampak Tek Siti lai tak apo apo dalam tragedi itu, paruik aku mulai gali gaes .

Kok kagalak anta .. kok ndak ka galak aku ko panggalak bana gaes…

Dek aku ko panggalak yo ndak bisa aku manahan do gaes. Aku bantai galak sorang gaes …

Untuang tak nampak dek Tek Siti….

Akhir dari carito nan ciek ko, kami pulang sajo lai gaes…

Catatan; Nama Tek Siti hanya tokoh khayalan saja.

Baca juga ;

Caracau Mery Ame (5) ; Hati Raman-raman Nan Kolak Tatap Babuekkan Juo Untuak Si Babank

Caracau Mery Ame (3) : Apak Apak Jan Cekeh Maagiah Pujian ka Bini Ndak..!