NOVEL BERBAHASA MINANGKABAU “Rindu Banda Sapuluah” (Bag 2)
Ermanto Tolantang
Nan balum mambaco Episode 1, klik dibawah ko;
NOVEL BERBAHASA MINANGKABAU: “Rindu Banda Sapuluah” (Bag: 1)
Episode (2)
Manunggu We-a Diak Lela
Di tanah rantau. Rindu ka kampuang batambah dalam. Di hakikatnyo marindukan kampuang, sadang di makrifatnyo marindukan Diak Lela. Lah babulan-bulan Barlian manahan rindu. Dek arok tiket kapatabang lai kamurah, nyatonyo bana makin maha. Mamakiak-makiak sarato berang bana hati Barlian, tapi ka siapo kadi adokkan. Nasib tu bana nan sadang malang. Basaba sajolah nan dipabanyak. Baitu bana nasib urang ketek bantuak Barlian. Supayo nak paham hati Tuan dan Puan sidang nan mambaco.
Dalam sahari duo hari ko, acok bana badariang pasan we-a di hape Barlian. Tiok diliek tanyato indak juo dari Diak Lela, tapi sambuah tarui we-a rang kampuang samo panggaleh kaki limo batanyo tantang pulang ka kampuang. Batambah panjang pangana Barlian. Mungkin kok arok ka harato lah maubah cinto Diak Lela.
Apolai kaba buruang dibaok dek Uda Tamburin supir truk nan baru saminggu tibo dari kampuang, mambuek Barlian sasak angok. Lah takaba jo tabarito bahaso Si Karim diam-diam lah datang sacaro khusus ka rumah Nurlela manamui Abaknyo Pak Rifa’i. Dek alasan babini untuak mandampingi pelantikan isuak sabagai anggota dewan, agaknyo luluah juo hati Pak Rifa’i. Karano itu pulo, batambah panjang manuang Barlian di tanah rantau. Dicaliak-caliak juo baju duo patagak untuak Diak Lela tu. Lamo bana arok nan ditahan Barlian untuak manunggu we-a Nurlela, sampai kini indak juo tibo. Tumpak ka badan si Barlian, kok nasi dimakan raso sakam, kok aia diminum raso duri. Ragu nan makin manyeso badan.
Dek lamo ragu jo bamanuang, tabayang taruik si Nurlela. Rindu ka Lela makin dalam. Rambuik tagerai hinggo bahu, tampak bana pipi Lela bak pauah dilayang nan merah-merah saketek. Muko barasiah lonjong jo daguak bak labah manggantuang. Alis mato bak samuik bairiang nan sadang bajalan dalam pasukan jo mato barasiah bak mato bidadari. Kok badan Lela tampak tinggi samampai. Ibarat rang kampuang ka Nurlela, parumahan bana nan lah data. Apo sajo nan ditagakkan rancak tarui kok dipandang. Sajuak tarui di dalam hati, sanang tarui di dalam kiro-kiro. Kok disabuik rancak Nurlela, di Kampuang Banda Sapuluah mungkin alun ado tandingannyo. Karano itulah, dek bungo harum nantun, banyaklah kumbang mancarinyo. Itulah tumpak ka badan Nurlela.
Kini batambah jauah pangana Barlian di tanah rantau. Diukua-ukua badan diri, dicaliak-caliak diri nangko. Kok indak dek rindu ka Nurlela, indak paralu pulang bana. Abak jo amak indak ka mungkin ka ditamui Barlian kecuali kok hanyo ka pandam pakuburan. Salain nantun, Barlian batamu jo adiak amak nan banamo Etek Mani. Singkeknyo pulang ka kampuang hari rayo isuak bana baarok ka Nurlela, bia cinto ko indak putuih, bisa ditaruikan ka janjang rumah tanggo.
Sampai kini ko di tanah rantau, kok hari lah baganti hari, lah saminggu puaso bajalan, nan siang lah baabih wakatu, nan malam lah baabih minyak, barito dari Lela di we-a indak kunjuang tibo. Arok jo cameh ditangguang Barlian surang diri. Kok tiok sudah sumbayang, Barlian lai mamintak kapado Tuhan supayo hati Nurlela indak barasak ka Uda Barlian. Pintak jo pinto Barlian ka nan satu, mudah-mudahan kareh nan di awak, lunak nan di Karim.
(Yo Karim kalera mah, andak mangguntiang dalam lipatan, andak manohok kawan sairiang loh si Karim .
Klik disiko sambuangnyo ka episode 3;
