NOVEL BERBAHASA MINANGKABAU: “Rindu Banda Sapuluah” (Bag: 1)
Oleh : Ermanto Tolantang
Pengantar Redaksi: Novel dalam bahasa Minangkabau digubah oleh Prof Dr Ermanto S.Pd M.Si yang dikenal dengan nama pena Erman Tolantang, mulai hari ini dan selanjutnya dapat anda nikmati. Selamat membaca;
“Surek Uda Berlian“
Nan salalu Uda Rindukan
Diak Lela
di Kampuang Banda Sapuluh, Tanah Minangkabau
Assalamualaikum warahmatullahi wabarakatuh,
Talabiah dahulu Uda Barlian sampaikan ka Diak Lela bahasonyo kaadaan Uda di tanah Jawa kecek rang kampuang, kini iyo agak damam paneh. Panyabab damam paneh Uda indak lain indak bukan dek mamikiakan tiket kapatabang pepe (pulang pai) nan maha bana untuak pulang kampuang hari rayo isuak. Namun samantang pun baitu, rindu Uda ka Diak Lela indak paralu bana Lela ragukan, bapatui pun nagariko Uda tatap pulang dan alah batekad tatap untuak manamui Diak Lela di hari rayo isuak. Agak ka malam lebaran pun Uda sampai di kampuang, Uda tatap bausaho.
Tantang karajo Uda di tanah rantau, paralu baliak Uda sampaikan bantuak nan Uda sampaikan salamoko malalui we-a, bahasonyo satahun balakang ko Uda masih manggaleh kaki limo, tapi Uda rasokan usaho kaki limo kini memang agak payah. Mungkin dek ekonomi tu bana nan manurun. Nan takana loh dek Uda, kiriman paket pulsa ka nomor hape Diak Lela lai masuak kan? Uda sangajo diam-diam mangirim tando cinto Uda nan indak putui ka Diak Lela.
Usaho galeh kaki limo ko adolah usaho Uda sambilan tapi salamo satahun tu pulo Uda lah maantahkan ijazah ka kantua demi kantua untuak malamar karajo. Nyatonyo, nasib baiak alun bapihak ka Uda. Alun juo batamu rueh jo buku. Uda tatap basabah sampai kini. Yakinlah awak bahaso urang saba pasti dikasihi Allah.
Karano itu pulo, walaupun Uda alun dapek karajo kantua dan masih tatap karajo galeh kaki limo, Uda mintak cinto Diak Lela jan baraliah ka nan lain. Karano itulah foto-foto Uda di tanah rantau tatap Uda kirim malalui we-a tando cinto Uda nan indak putui ka Diak Lela. Randang nan Diak Lela buekkan wakatu Uda barangkek marantau dulu jauah labiah lamak dari nasi nan Uda bali di tanah rantau ko. Karano itulah, cinto Uda ka randang, mukasuik Uda ka Diak Lela, indak bisa diganti jo nan lain.
Tapi babarapo bulan patang Uda agak kecewa dek indak ado Diak Lela mangirim foto ka we-a Uda lai, makonyo Uda kirimkan paket pulsa nantun. Untuak babarapo hari ka muko, kok dapek kirimlah foto-foto Diak Lela untuak maubek raso rindu Uda.
Babaliak ka rancana pulang Uda, kini Uda lahbatekad untuak pulang hari rayo isuak. Tandonyo adolah Uda lah mambalian baju rancak duo patagak untuak Diak Lela nan bisa Diak Lela panggakkan tando Diak Lela punyo Uda nan sadang marantau di Tanah Jawa.
Kalau Uda etong-etong tiket kapatabang tu tatap maha, Uda tatap pulang manumpang jo oto truk nan sopirnyo Uda Tamburin lai urang kampuang kito juo. Uda lah bajanji ka manumpang jo Uda Tamburin nan dipakirokan samalam manjalang hari rayo alah sampai di kampuang. Itu Uda lakukan untuak manjago cinto kito indak putui. Sabab Uda takui, kalau indak pulang tantu Diak Lela, cinto Uda disemba pulo dek kawan-kawan Uda di kampuang karano tantu Amak Diak Lela tatap manyasakkan Diak Lela untuak capek balaki.
Dari Tanah Rantau
Udamu nan salalu marindukan,
Barlian Koto
NB (aratinyo Uda indak tau loh do):
Kalau Diak Lela lai indak banyak karajo, balelah we-a Uda ko. Buliah lapehlo taragak Uda di tanah rantau.
Lanjutkan ka Episode 2, klik nan dibawah ko;
