NOVEL BERBAHASA MINANGKABAU “Rindu Banda Sapuluah” (Bag 3)
Nan Mangarang dan Manulih Novel ko namonyo Erman Tolantang
Nan alun mambaco Episode 1 s.d episode 2 klik dibawah ko:
Episode (3)
“Paniang Paniang Lalek”
Sajak kapatang Barlian lah paniang-paniang lalek di tanah rantau. Dek bansaik mangko marantau. Marantau ka tanah Jawa. Dek alun bakantua mangko manggaleh. Manggaleh di kaki limo. Tapeknyo bana di suduik Tanah Abang. Sajak sataun nan balalu, rantau dijalang dek Barlian jo tekad nan kuek, ibaratnyo “tabujua lalu tabalintang patah” sarato janji nan lah diikek jo Nurlela bahaso janji cinto nan indak kadiungkai lai.
Kini tabayang bana dek Barlian, taraso janji Nurlela tu kok mulai kabua. Mulailah ragu dalam batin, mulailah taraso dalam kiro-kiro. Kok bana Si Karim nan mengguntiang dalam lipatan, nan manohok kawan sairiang. Ka mano, muko kadisuruakan, jo apo malu kaditutuik. Makonyo Barlian paniang-paniang lalek.
Kok dibilang Tanah Abang kini, pagi lah tingga, siang lah kadijalang. Ibaraik di kampung, lah mulai rami urang di balai, lah mulai langang urang di tapian. Lah sudah bakotek ayam kampuang tigo kali. Lah baru kalalok anak-anak di dalam buayan. Dalam agak-agak, lah satangah sapuluah dalam kiro-kiro. Galeh mulai dikambang dek Barlian.
Tumpak kapado galeh Barlian, sapatu dikambang nan baragam-ragam, sarato ikek pinggang digantuang panjang nan jo singkek. Ditambah pulo nan di sampiangnyo, parfum diderekan gadang jo ketek. Bak nantunlah galeh dikambang dek Barlian di kaki limo.
Kini wakatulah baransuah siang juo, lah babaliak Barlian sumbayang zuhur dari musajik, nan galeh baru tajua ciek jo duo. Jatuah ka dalam ayia mato. Untuang galeh untuak makan siang alun dapek, mako lapa ditahan sajo ka makan sanjo. Namun samantang pun baitu, untuak maisi wakatu luang, quran dipacik lalu dibaco jo irama mangalun lambek-lambek. Sambia manggaleh, amal batambah; sambia badiang nasi masak; sambia manyilam minum ayia. Kok lai galeh tajua dilayani juo.
Sadang tagayiang bacaan quran dek Barlian sarato jo irama nan rancak pulo, tatagunlah nak gadih rancak di muko galeh. Caliaknyo lamo ka Barlian, agak tasirok darah di dado. Dipandang lamo dek Barlian, batambah tasirok darah di dado. Tabayang bana Nurlela nan di kampuang. Bantuak saroman tinggi pulo. Ndak lamo sasudah nantun, lah batanyo jawek pulo Barlian jo nak gadih tu, sahinggo tabukakloh carito bahaso nak gadih tu mahasiswa pulo.
“Abang, berapa harga parfum ini?” suaro alui nak gadih rancak nan tadi lah mangaku mahasiswa di ibukota ko.
“Tiga puluh lima ribu saja ya dek!” jawek Barlian jo bahaso Indonesia nan masih babaun bahaso Minang.
“Baiklah Abang, eh Uda maksud adek. Tapi harus ditambah bonus dengan nomor we-a Uda ya?” jawek nak Gadih rancak tu. Agak malu-malu, Uda Barlian maangguk bantuak balam mau. Tapaso parfum disarahan sambia manyabuik nomor we-a nantun.
Mandanga suaro anak gadih tu, batambah badabok darah di dado. Bacabang duo panganah Barlian nantun. Kapalo nan sadang paniang lalek, lah tibo sajo nan kajadi ubek. Dilapeh sajo jo ujuang mato nak gadih tu sampai jauah. Lapa ilang jo lah lupo sajo. Dek ari lah makin sanjo juo, ditutuik galeh sambia mandanga-danga bunyi we-a nak gadih tu kok katibo.
Sambungannyo liek di episode 4, klik dibawah ko
