NASIB GURU HONORER
“Tam… Ko ado Pasan dari anak pak Rijal AFF di Dharmasraya, cubo buek ota tantang guru honor kecek e,” kata Utiah Kapeh pada Tam Arang pagi tadi Sabtu (29/7) saat memulai perbincangan mereka di Lapau Mak Gambuang.
“Onde Tiah…, kalau masalah guru ma den ka pandai maotakan-nyo, jadi murid sajo den tak pandai, kunun kok ka maotakan jadi guru pulo tantu ndak nyambuang lah beko-nyo.” jawab Tam Arang
“Kesimpulan ang tu salah mah, ang ndak pernah mecaliak urang manonton main bola?”
“Lai.”
“Bara banyak urang manonton main bola ang caliak katiko, pemain tu ndak sempat mamasuakkan gol ka gawang lawan, apo kecek penonton?”
“Acok menyalahkan pemain.”
“Batuah, seolah olah penonton lebih santiang pado pemain. Bahkan Cristian Ronaldo pun Acok disesalkan penonton. Iyo apo ndak macam itu ?”
“Iyo pulo mah.”
“Kalau lai ang akui, den mulai carito guru honor lai yo.”
“Mo lah”
“Nasib guru honor ko sadiah awak. Bilo tibo bulan mancaliak kawan nan lah PNS tarimo gaji, manggarik jakun jakun awak, urang lai nan kanyo tarimo, tibo diawak mancaliak sajo, mancalebe sajo. Honor daerah lai ado tapi sakali 3 bulan pulo manarimo. Itupun ndak sabarapo jumlahnya, Jan kan ka dapek bali baju, kadang bali sabun jo bali badak sajo tak cukuik perkwartal itu.”
“Iyo tu, kamanakan den surang tamat UNP, sarjana, honor SD lo dapek, itu untuang mangko dapek honor karano laki adiak ayahnyo lai Kapalo sekolah. Ko indak mungkin Ndak dapek honor doh. Honor di SMA atau di SMP panuah kecek Kapalo sekolahnyo. Dari pado menganggur di rumah bia lah honor sajo. Kan tiok pagi lai dapek pakai baju nan barasia.:’
“Lah bara tahun kamanakan ang tu honor Tam?”
“Lah ado sakitar 10 tahun, sampai kini alun juo taangkek lei. Babeda samo pak YY dulu begitu tamat dari IKIP liau langsung maaja diangkek jadi Guru SPG Bukittinggi.”
“Dulu kok kadibaco antahlah. Jadi guru tu murah sangaik dimaso pak YY tu, 35 tahun nan lalu, urang tamat IKIP tu sangenek. formasi guru banyak nan kurang, makonyo lakeh diangkek.”
“Kini malapah urang nan tamat, malahan ado si Andragogy Usman lah S2 kini masih honor. Kabanyo untuak honor tapaso lo minta surek sakti ka pak Walinagari, kalau ndak, tak amuah Kapalo Sekolah manarimo honornyo.”
“Nan padiahnyo baa dek ang Tam?”
“Apo nan padiahnyo tu Tiah?”
“10 urang Guru nan ma aja, hanyo 3 urang nan PNS, salabiahnyo honor Jo sukarela.”
“Suruah sajo saba kaponakan ang tu Tam, mudah mudahan lakeh diangkek jadi guru ASN (Aparatur Sipil Negara).”
“Iyo Tiah. Tanggung pulo ko kabarantih, jangan jangan beko awak kalua, nyo angkek dek Presiden Jokowi nan honor ko sadonyo. Kan rugi awak tu.” ujar Tam Arang menyudahi obralan singkat mereka.
“Alun lai nasib guru TK atau PAUD, ka sukarela sajo sampai gaek?”
“Mungkin ikolah nan dikatakan Pendidikan itu juga menjadi tanggung jawab masyarakat. melalui kawan kawan nan suka rela itu mukasuiknyo???”
“Antahlah….”
Perbincangan mereka hari ini memang tak begitu panjang, tadi saat ke warung datang terlambat. Mereka harus menyudahi pembicaraan bergegas kesawah untuk mengontrol kondisi air dilahan pertanian mereka. (YY/RJl)
