NOVEL BERBAHASA MINANGKABAU “Rindu Banda Sapuluah” (bag 6)
Nan Manulih : Ermanto Tolantang
Nan balum membacok episode 1 s.d episode 5 klik link dibawah ko;
Episode (6)
Pasan We-a Nurlela Nan Batubi-tubi
Dek karano agak lamo mato Barlian indak bisa lalok mamikian cakak jo Nurlela tadi malam, mako agak talambek jago Uda Barlian untuak makan sahur. Baa kaindak, baru pukua tigo, Barlian baru bisa mamiciangkan mato. Kalau indak salah, sakiro tigo baleh minik manjalang wakatu imsak, baru Barlian tajago. Indak ado lai, Barlian langsuang bagageh sajo ka kamar mandi, sudah tu langsuang pulo maambaik nasi nan alah diasiangkan tadi malam. Saroman urang kalaparan duo minggu caro makan Barlian. Makan tasasak bantuak urang dikaja ula. Singkeknyo pas saminik manjalang wakatu imsak, Barlian alah mambasuah tangan. Sasudah tu hape diiduikkan sakali untuak bajago-jago pasan we-a dari Diak Rahmi kok ka masuak.
Indak lamo sudah sumbayang subuah sarato lah sudahlo mambaco quran, badariang-dariang lo bunyi hape tando pasan we-a masuak tigo kali labiah. Lah mulai indak lamak parasaan Barlian. Iko lah pasti Nurlela komah. Kecek Barlian dalam ati sajo.
“Uda… ”
“Uda… ”
“Uda Barlian… ”
Dibaco jo ati nan sadang indak lamak dek Barlian.
“Iyo…,” baleh Barlian.
“Baa kok singkek sajo jawek Uda,” bunyi pasan Nurlela.
“Iyo Lela. Apolai…,” jawek Barlian.
“Baa kecek Uda. Apo lai? Baa Uda bantuak urang indak basalah sajo. Baa kok Uda matian sajo hape Uda tadi malam. Gara-gara Uda tadi matian hape Uda tadi malam, indak lalok mato Lela sapiciang juo sampai kini dek Uda mah. Baa Uda nan sabananyo kini ko?” tanyo Nurlela dari Kampuang Banda Sapuluah.
Mambaco pasan we-a tu tapaso mauruik dado sajo Barlian nangko. Takana juo ajaran baik dari ayahnyo daulu dek Barlian. “Sipaik urang laki-laki haruslah pabanyak sabah kutiko bahadapan jo urang padusi. Kalau urang padusi tu calon ka bini awak, apolai urang padusi tu bini awak,” bunyi pasan ayah nan masih tangiang-tangiang di talingo Barlian.
“Iyo, apo lai?” baleh Barlian masih singkek juo baru lai.
“Uda tarui baitu. Apolai juo kecek Uda. Sakik kapalo Lela kini mah dek Uda. Uda pasti lah babini yo atau lah dapek urang Betawi tu pangganti Lela,” kato Lela manuduah jo caro manggunokan tembakan duo baleh pas ka gawang Barlian.
“Baa kok baitu kecek Lela?” baleh Barlian.
“Lah pasti sajo itu nyo. Duo malam nan lalu, Lela bamimpi bahaso baju lelah diambiak anak gadih lain. Anak gadih tu rancak bana loh dalam mimpi tu,” kato Lela.
“Lela picayo loh ka mimpi. Jaleh mimpi tu permainan lalok sajo mah,” kato Barlian indak basumangek do. Dalam ati Barlian rusuah juo dek sasuai loh jo kadaan Barlian kini di bulan puaso ko.
“Uda pasti lah babini. Iyo kan? Mangaku sajo lah Uda,” bunyi pasan Nurlela baliak.
“Indak ado doh Lela,” jawek Barlian.
“Indak picayo Lela doh ka Uda. Saujuang kuku sajo Lela indak picayo doh. Rancak mangaku sajo Uda lai,” baleh Nurlela.
“Kok iyo iyolah. Uda iyo alah babini,” jawek Barlian dek sakik ati karano kanai tuduah tarui.
“Ah kan iyo tu Uda alah babini kironyo. Kan iyo batua mimpi Lela tu kan?” tulih Nurlela bantuak maratok.
“Kok iyo Uda alah babini, apo nan karancak dek Lela lai!” tulih Barlian saketek agak emosi.
Agak lamo ditunggu Barlian, kini indak ado baleh pasan dari Nurlela. Indak lamo sasudah tu, lah nyo matian pulo hape dek Nurlela. Sudah tu takana pulo nanbana dek Barlian.
Barlian kini maraso basalah dek manyakiti ati Nurlela dari tanah rantau. Raso-raso tu tibo dek taingek ajaran baik dari ayah sabalun maningga dulu.
“Nak Barlian, kalau lah gadang isuak, kutiko mangecek atau kutiko batangkah jo calon bini ataupun jo bini, tolong ilangkan raso pantang kalah tu ka urang padusi tu,” itu ajaran ayah Barlian tu dulu nan masih takana. “Harus awak nan capek mangalah. Bialah urang padusi tu diagiah manang. Itu indak bararti loh awak kalah. Urang laki-laki indak tapek batandiang jo urang padusi. Tolong jago bana parasaan urang padusi tu,” itulah bunyi pasan ayahnyo nan masih tangiang-ngiang sampai kini.
“Bialah beko malam Uda we-a baliak Nurlela. Uda minta maaf ka Nurlela,” kecek Barlian dalam ati.
